“Alyaskapox” virusundan ilk ölüm faktı qeydə alınıb. Bu barədə Oxu.az 12 fevral tarixində xəbər verib.
Virus səbəbindən yaşanan ilk ölüm ABŞ-nin Kenay yarımadasında baş verib.
Versiyalardan birinə görə, infeksiya mənbəyi mərhumla birlikdə yaşayan pişik olub.
Alyaskanın səlahiyyətlilərinə görə, yaşlı adam uzun müddət xəstə və həkimlərin nəzarəti altında olub. Həkimlər onun çiçək xəstəliyinə tutulduğunu hesab ediblər, çünki onda bu xəstəliyə xas olan simptomlar müşahidə olunub: qızdırma, böyümüş limfa düyünləri, qırmızı ləkələr və immun sisteminin zəifləməsi. Lakin kişinin ölümündən sonra həkimlər onun xəstəlik tarixçəsini və analiz nəticələrini yenidən nəzərdən keçiriblər.
Kişinin qanında “Alyaskapox” kimi tanınan AKPV virusunun izləri tapılıb.
2015-ci ildə aşkar edilən virusa bu günə qədər yalnız beş nəfər yoluxub və onlardan hamısı sağ qalıb.
Virusoloqların fikrincə, virus ilkin olaraq, mal-qarada yaranıb, sonra gəmiricilərə, onlardan isə ev pişiklərinə keçib. Ehtimal olunur ki, ölən təqaüdçü ev heyvanının yüngülcə dişləməsi nəticəsində xəstələnib.
