Bildiyimiz kimi, hamilə qadınların siqaret çəkməsi, hətta kiminsə onun yanında siqaret çəkməsi belə, məsləhət görülmür. Çünki bu körpənin səhhətinə ziyan verə, həmçinin onun həyatı üçün təhlükənin yaranmasına səbəb ola bilər.
Bəzi fikirlərə görə tütünün tərkibindəki zəhərli maddələr tənəffüs yollarını zədələyərək, körpənin tənəffüs sisteminin inkişafının zəifləməsinə səbəb olur. Bu da astmanın yaranmasına təkan verə bilər.
Bu fikirlər nə dərəcədə reallığa uyğundur?
Mövzu ilə bağlı Bizim.Media-ya açıqlama verən ginekoloq Təranə Əzizovanın fikrincə, hamilə qadının siqaret çəkməsi ziyanlıdır, amma bunun nəticəsində uşaqda astma yaranması mütləq deyil:
“Siqaret çəkən anaların uşaqlarında astma xəstəliyi inkişaf edə bilər, ancaq bu tam da dəqiq deyil. Çünki astma iki cür olur: bronxial və allergik astma. Bəli, yeni doğulan uşağın bronxlarında belə problemlər ola bilər. Bu, allergik tiplidir. Uşaq doğulanda qanında nikotin turşusu çox olduğu üçün bu da bronxa spazm verir. Buna görə də onlarda allergik tipli öskürəklər ola bilər”.
“Ana hamiləlikdə siqaret çəkərsə, uşaq çox əsəbi və ağlağan ola bilər”.
Ginekoloq hamilələrin siqaret çəkməsinin digər zərərlərindən də danışıb:
“Ümumiyyətlə, siqaret çəkmək qadın üçün çox zərərlidir, hamilə qadın üçün isə daha zərərlidir.
Birincisi, siqaretin tərkibindəki nikotin turşusu beyindaxili təzyiqin artmasına, beyin damarlarının yığılmasına, spazmın artmasına səbəb olur. Həmin nikotin qan vasitəsilə dölə keçir, döldə də həmin fəsadları yaradır. Buna görə də siqaret çəkən ananın körpəsi doğulduqda beyindaxili təzyiqləri çox yüksək olur, həmçinin əsəbi, ağlağan olurlar. Çünki 9 ay ananın bətnində nikotinə öyrəşən uşağın bədənində buna tələbat olur.
Doğulduqdan sonra isə bu tələbat ödənilmədiyi üçün uşaq çox əsəbi, ağlağan olduğu üçün nevroloq tərəfindən müalicə olunmalıdır”.
Ginekoloq vurğulayıb ki, ananın hamiləlikdə siqaret çəkməsi nəticəsində uşağın sinir sistemində problem ola bilər: “Nəticədə, əqli gerilik, inkişafın çatışmazlığı qeydə alına bilər. Qadınlara tövsiyə edirəm ki, onlar hamiləlikdən öncə siqareti tərgitsinlər ki, bədən bir müddət təmizlənsin”.
