Son günlər cənub bölgəsində yağan aramsız intensiv yağışlar Astara rayonunun Şiyəkəran kəndində yeni salınan piyada körpüsünü dağıdıb. Bu barədə 16 oktyabr tarixində APA məlumat verib.
Sakinlərin dediyinə görə, körpü illərdir qəzalı vəziyyətdə olub.
Qeyd edilib ki, son dəfə yağan yağışlar zamanı çayda suyun səviyyəsi artıb və qəzalı körpünü sel suları aparıb. Bundan sonra əraziyə ağır texnikalar cəlb olunub, köhnə körpü tamamilə sökülüb, yerində yeni piyada körpüsü salınıb. Lakin ötən həftə salınan yeni körpü sakinlərə çox xidmət edə bilməyib.
Sakinlərin istifadə edə biləcəyi alternativ yol isə təqribən 6 kilometr məsafədə yerləşir. Bu yoldan da yalnız piyadalar və kiçik maşınlar istifadə edə bilər. Həmin körpü də qəzalı vəziyyətdə olduğu üçün fermerlər əkdikləri sitrus meyvələrini bazara çıxarıb, sata bilmirlər.
