Pandemiya dövründə dünyada və ölkəmizdə kriptovalyutalara maraq artıb. Bu haqda 1 sentyabr tarixində “Report”a açıqlamasında “Unicapital" investisiya şirkətinin şöbə müdiri Seymur İbadov deyib.
“Kriptovalyutaların sayının çox olmasına baxmayaraq əsas bir neçə kriptovalyutalar mövcuddur. Hazırda kriptovalyutaların bazar dəyəri 2 trilyon ABŞ dollarından artıqdır. İlk növbədə bu tip alətlər arasında ilk rəsmi kriptovalyuta hesab edilən "Bitcoin", ikinci yerdə isə "Ethereum" qərarlaşıb. Onlardan sonra "Cardano", "Binance Coin", "XRP,Dogecoin", "Solana", "Polkadot", "Uniswap" yer alıb”, - deyə Seymur İbadov əlavə edib.
Kriptovalyuta investisiya və alış-veriş imkanı yaradan rəqəmsal valyuta növüdür. Kriptovalyuta ənənəvi ödəniş vasitələri ilə müqayisədə bir sıra üstünlüklərə malikdir. Bu rəqəmsal valyuta növləri ilə aparılan əməliyyatlara banklar və ya dövlətlər tərəfindən nəzarət edilmir. İstənilən şəxsə gecikmə olmadan və əlavə pul tutulmadan ödəniş etmək mümkündür. Daha bir üstünlük ondan ibarətdir ki, kriptovalyutayla aparılan əməliyyatlar daha təhlükəsizdir. Bunun əsas səbəbi həmin əməliyyatlarda üçüncü şəxslərin iştirak etməməsidir.
