Həkim Fuad Nəzərov 8 yaşlı Mirməhəmməd Seyidlini sünnət əməliyyatı edərkən cinsiyyət oqanını zədələyib. Bununla bağlı uşağın atası Çingiz Seyidli Sonxeber.az- a məlumat verib.
Bu barədə 2 avqust tarixində İnsanoid xəbər verir.
Uşağın atası M.Ə.Əfəndiyev adına 2 saylı Şəhər Klinik Xəstəxanasına müraciət edib. Oradakı həkim Fuad Nəzərov M.Ə.Əfəndiyev adına 2 saylı Şəhər Klinik Xəstəxanasının antisanitar vəziyyətdə olduğunu bildirib və əməliyyatın "Euromed" tibb mərkəzində olmasını məsləhət görüb. Fuad Nəzərov "Euromed" tibb mərkəzində uşağı lazerlə sünnət edib. Sünnət zamanı uşağın cinsiyyət orqanı ciddi zədələnib.
“Dövlət xəstəxanasında əməliyyat 200-250 manat olsa da, antisanitar vəziyyət var, özəldə bir az baha olsa da, təmizdir. “Euromed” klinikasında 750 manat ödəniş etdim. Uşaq 2 saata yaxın əməliyyatda qaldı. Həkim kremlər yazmışdı ki, bunları çəksəz, yara keçəcək. 3 gün sonra gördüm ki, uşaq qan içindədir. Sidiyə gedəndə uşaqdan qan gəlirdi. Fuad həkimə bu barədə məlumat verdim. O qeyd etdi ki, narahat olmayım, keçib gedəcək”, - deyə uşağın atası söyləyib.
Uşağın valideyni bildirib ki, sarıq qoyulan yerə baxdıqdan sonra görüb ki, uşağın cinsi orqanı düzgün kəsilməyib və tamamilə zədələnib.
“Dəfələrlə Fuad həkimin yanında oldum. Bildirdi ki, narahat olma, həll yolunu tapacam. Məni Gündüz Ağayev adlı həkimə yönləndirdi. Gündüz həkim uşağı müayinə etdi və dedi ki , toxumaların bərkiməsi üçün 8 ay gözləmək lazımdır. 8 ay sonra yenə Gündüz Ağayevin yanına getdim. Uşağa baxıb dedi ki, mən bunu əməliyyat edə bilmərəm”, - Mirməhəmmədin atası bildirib.
Gündüz Ağayev onları Rafael Soltanov adlı həkimə yönləndirib. Uşaq 4 saat 40 dəqiqə əməliyyat olunub. Alt dodağından ət götürüb, cinsiyyət orqanına tikiblər.
“Mirməhəmmədə silikon kateter qoyulmuşdu. Uşaq yenə sidiyə gedəndə qan gəlirdi. Uşağı pis vəziyyətə salan həkim indi yaxına durmur. Mənim şikayətim Fuad Nəzərovdandır. Həkim məsuliyyəti üstündən ataraq, bizimlə kobud danışır. 3 il əvvəl uşağın anası vəfat edib. Hazırda oğlum da, mən də stres yaşayırıq. Müvafiq orqanlardan bizə yardım göstərilməsini istəyirik”, - uşağın atası əlavə edib.
Həkim Fuad Nəzərov bildirdi ki, atanın iddiaları əsassızdır. Uşaqda psixoloji və uroloji problemlər olub. Hazırkı problem sünnət əməliyyatı ilə əlaqəli deyil.
