Beyləqanda yetkinlik yaşına çatmayan qızla cinsi əlaqədə olan kişi həbs olunub.
İnsanoid.com xəbər verir ki, 31 yaşlı Valeh Şəfizadə (ad və soyad şərtidir) 16 yaşı tamam olmayan qızla cinsi əlaqədə olub.
Nəticədə yeniyetmə hamilə qalıb və qız övladı dünyaya gəlib. Bu əməlinə görə Valeh barəsində Cinayət Məcəlləsinin 152.1-ci (14 yaşına çatmış, lakin 16 yaşına çatmayan şəxslə cinsi əlaqədə olma, yaxud seksual xarakterli hərəkətlər etmə) maddəsilə cinayət işi açılıb.
İttiham aktına görə, zərərçəkənin valideynləri onun 4 yaşı olarkən boşandıqdan sonra qız atasının himayəsində böyüyüb.
Valeh 2023-cü ilin mayında qohumlarının vasitəsilə tanış olduğu 14 yaşlı qızla ailə qurmaq istəyib və iyunda Ağcabədidə nişanlanıblar. 2024-cü ilin yanvarında qız evdən qaçaraq Valehin qardaşının evinə gedib, Valeh də ora gələrək onunla görüşüb, daha sonra isə qızı atasının evinə qaytarıb.
Məlumata görə, qız və oğlanın razılığı ilə onlar təbii yolla cinsi əlaqədə olublar. Nəticədə yeniyetmə hamilə qalıb və 1 qız övladı dünyaya gəlib.
2025-ci ilin mart ayında isə təqsirləndirilən şəxs polisə dəvət olunub və ona 16 yaşına çatmayan şəxslə cinsi əlaqədə olduğu üçün məsuliyyət daşıdığı bildirilib. Valeh bildirib ki, uşaq dünyaya gələndən sonra bir daha zərərçəkənlə cinsi əlaqədə olmayıb.
Zərərçəkənin sözlərinə görə, onlar qeyri-rəsmi yolla ailə qurublar və təqsirləndirilən şəxslə uzaq qohum düşürlər. Ona qarşı şikayəti yoxdur və bir ailə kimi yaşayırlar.
Beyləqan rayon Məhkəməsinin qərarı ilə Valeh Şəfizadə barəsində 6 ay müddətinə azadlıqdan məhrum etmə cəzası təyin edilib.
