“Azərsun Sənaye Parkı”ndakı yanğın nəticəsində dəyən ziyanın məbləği 10 milyon manatlarla ölçülür. Bu haqda aprelin 29-da APA xəbər yayıb.
Yanğın əvvəlcə plastik qablar fabrikindən başlayıb, daha sonra isə kərə yağlarının yığıldığı soyuducu anbara yayılıb. Burada satış üçün nəzərdə tutulan 5-6 aylıq yağ ehtiyatı olub. Bu məhsullar həm yerli bazar, həm də ixrac üçün nəzərdə tutulmuşdur. Məlumata əsasən, yağ anbarına dəyən ziyanın həcmi 10 milyon manatlarla ölçülür.
Plastik qablar fabriki yeni yaradılmışdı və tam gücü ilə işləmirdi. Təkcə məhsula dəyən zərər 20-30 milyon manat məbləğində qiymətləndirilir.
Xəbərdə, həmçinin qeyd olunub ki, yanğın səbəbindən təkcə məhsullara deyil, istehsal avadanlıqlarına da ziyan dəyib, depolama anbarlarından biri sıradan çıxıb.
“Azərsun Sənaye Parkı”nda ziyan dəymiş əmlaklar və yanan məhsullar sığortalı olub və dəymiş zərərə görə sığorta ödənişi veriləcək.
