Keçən ilin dekabr ayında Yasamal rayonunda 6 yaşlı Dəniz Qəhrəmanovanın ölümündə təqsirləndirilən tibb bacısı 1il azadlıqdan məhrum edilib. Bu barədə aprelin 21-də Qafqazinfo məlumat yayıb.
Yaşadığı evdə tibb bacısı kimi xidmət göstərən 1959-cu il təvəllüdlü İ. Quliyeva Cinayət Məcəlləsinin “ehtiyatsızlıqdan adam öldürmə” maddəsilə təqsirləndirilib. Məlum olub ki, onun tibbi təhsili yoxdur.
Keçən il dekabrın 13-də İ. Quliyevanın qonşuluğunda yaşayan ailə uşaqlarının qrip olduğunu bildirərək onlara antibiotik vurmasını xahiş edib. Tibb bacısı 10 yaşlı oğlana və 6 yaşlı qıza sınaq etmədən “Seftriaksion 500 mg” iynəsi vurub.
Oğlanda hər hansı neqativ reaksiya olmasa da, 10-15 dəqiqə sonra qız şoka düşüb. Tibb bacısının antibiotiklərlə bağlı şoka qarşı pereparatı olmadığından uşağa dərhal yardım göstərilməyib. Təxminən 1 saat sonra azyaşlı Respublika Klinik Xəstəxanasına çatdırılsa da, onun həyatını xilas etmək mümkün olmayıb.
Aprelin 19-da başa çatan məhkəmə prosesində azyaşlının ailəsi İ. Quliyevadan şikayətçi olmadığını bildirib. Ona 1 il müddətinə azadlığın məhdudlaşdırılması cəzası verilib və üzərinə elektron nəzarət cihazı tətbiq edilib.
