Paytaxtın Nərimanov rayonunda yerləşən “Eurohome” ticarət mərkəzinin fəaliyyəti qismən dayandırılıb. Bu barədə mayın 6-da Fövqəladə Hallar Nazirliyindən məlumat verilib.
Qeyd edilən tikinti materiallarının satışı mərkəzində yoxlama zamanı yanğın təhlükəsizliyi sahəsində çoxsaylı nöqsanlar aşkar edilib.
Belə ki:
- mərkəzin ərazisində yanğın su hovuzu inşa edilməyib və hidrantlar quraşdırılmayıb;
- mərkəzin ərazisində fəaliyyət göstərən obyektlərdə elektrik naqilləri yanar materialların üzərindən çəkilib, avtomatik yanğın xəbərverici siqnalizasiya qurğuları quraşdırılmayıb;
- mərkəz ilkin yanğınsöndürmə vasitələri və odsöndürən balonlarla tam təmin olunmayıb;
- obyektlərdə olan insanları yanğın hadisəsi haqqında xəbərdar etmək üçün xəbərverici qurğular quraşdırılmayıb.
Qeyd edək ki, “Eurohome” təhlükəsizlik pozuntuları səbəbindən 2019-cu ilin dekabrında və 2020-ci ilin mayında yanmışdı. Dekabrda baş verən yanğın zamanı vətəndaşlara 17,5 milyon manat ziyan dəymişdi.
