“Baku TV”yə “Arzunun vaxtı” proqramı ilə bağlı xəbərdarlıq olunub. Bu barədə 1 fevral tarixində Audiovizual Şura məlumat yayıb.
Audiovizual Şuranın onlayn iclasında bildirilib ki, "Baku TV" kanalının efirində yayımlanan “Arzunun vaxtı” proqramının 29 yanvar 2024-cü il tarixli buraxılışı 16 yaşlı yeniyetmə qız və 32 yaşlı fiziki əlilliyi olduğu bildirilən gəncin evlənməsinə həsr olunmuş, onlardan müsahibə alınmışdır. Məlum olmuşdur ki, həmin yeniyetmə qız və gənc oğlan artıq bir neçə müddətdir ki, öz istəkləri ilə birgə ər-arvad münasibətlərində yaşayır və yaxın zamanlarda (qızın 17 yaşı tamam olanda) nikah bağlamalarını nəzərdə tuturlar.
Proqram zamanı onun aparıcısının bir neçə dəfə 18 yaşına çatmamış şəxsin qeyri-nikah əlaqələrində olaraq digər şəxslə birgə yaşama faktını pisləyən mesajlar verməsinə baxmayaraq, verilən suallar, həmin suallara cavablar, bu əməli etmiş şəxslər üçün yardım toplanması kampaniyasının keçirilməsi halı, əslində erkən nikahın əks-təbliği üçün nəzərdə tutulan proqramı faktiki olaraq, həmin erkən nikahın təbliğinə yol açan vasitəyə çevirmişdir.
Qeyd olunub ki, müsahibə zamanı aparıcı və müsahiblər arasında dialoqlarda səsləndirilən fikirlər "Uşaqların zərərli informasiyadan qorunması haqqında" Qanunun 4.2.2-ci maddəsində öz əksini tapmış "cəmiyyət əleyhinə və hüquqazid hərəkətləri, o cümlədən cinayətləri təbliğ edən informasiya", eyni zamanda həmin Qanunun 4.2.4-cü maddəsində nəzərdə tutulmuş "ailə institutunu nüfuzdan salan informasiya" olmaqla uşaqlar arasında dovriyyəsi qadağan edilən informasiyaya aid oluna bilər.
Audiovizual Şura tərəfindən bildirilib ki, proqramda işıqlandırılan hadisə və mövzu birtərəfli və natamam şərh olunmuş, bir sıra qanunvericilik tələbləri pozulmuşdur. "Baku TV" kanalının efirində belə halın ilk dəfə baş verməsini nəzərə alaraq, Audiovizual Şuranın üzvləri yayımçıya yalnız xəbərdarlıq edilməsini dəstəkləmiş, ümumən bütün media nümayəndələrinə belə həssas hadisələrin müzakirəsi zamanı daha peşəkar olmalarını, müvafiq dövlət qurumları ilə kommunikasiya yaradaraq hadisəni daha dolğun işıqlandırmalarını, ümumən qanunvericiliyin tələblərini və ümumi qəbul olunmuş ictimai normaları əsas tutmalarını tövsiyə etmişlər.
