Braziliya - Argentina matçında azarkeşlərlə polis arasında əlbəyaxa dava olub. Bu barədə İnsanoid yerli mətbuata istinadən bu gün, 22 noyabr tarixində xəbər verir.
Stadionda azarkeşlərlə polis arasında baş verən qarşıdurma səbəbindən matçın başlanması ləngiyib.
Hətta argentinalı futbolçular da münaqişəyə müdaxilə ediblər. Bundan sonra qonaqların kapitanı Lionel Messi komandanı meydandan çıxararaq paltardəyişmə otağına aparıb.
Argentina millisi 2026-cı ildə ABŞ, Meksika və Kanadada keçiriləcək dünya çempionatının seçmə mərhələsində Braziliya yığmasını məğlub edib. "Marakana" stadionunda keçirilən görüş qonaqların 1:0 hesablı qələbəsi ilə başa çatıb.
Oyunda yeganə qolu 63-cü dəqiqədə müdafiəçi Nikolas Otamendi vurub. 82-ci dəqiqədə isə braziliyalı hücumçu Joelinton birbaşa qırmızı vərəqə alaraq meydandan qovulub.
