Novruz bayramının sonuncu çərşənbəsi hesab olunan “Torpaq çərşənbəsi” bayrama daha yaxın olduğu üçün insanlar tərəfindən xüsusi qeyd edilir. Xalq arasında “Yer çərşənbəsi”, “İlaxır çərşənbə”, “Çərşənbə-suri” adları ilə də tanınır.
Bu çərşənbə yazın gəlməsinə daha az vaxtın qaldığına işarədir. Torpaq çərşənbəsi günü yer oyanır, torpaq nəfəs alır, əkinə, toxum səpininə hazır olur.
Türk mifologiyasına görə, yatmış torpaq oyanaraq insanları aclıqdan qurtarır. Bütün evlərdə bayram süfrələri açılır, cürbəcür yeməklər, əsasən, aş, şirniyyatlar: paxlava, şəkərbura, şəkərçörəyi, şorqoğalı hazırlanır.
Bu çərşənbədə axşam şənliklər təşkil olunur, küsənlər barışır, evlərdə üzərlik yandırılır, tonqallar qalanır. İnsanlar tonqalın üstündən yeddi dəfə tullanaraq: “Ağırlığım bu odda yansın”, - deyirlər. Tonqal üstündən atlanmaq köhnə ilin dərdlərini odda yandırmaq, yeni ilə qədəm qoymaq deməkdir.
