Avqustun 7-dən nəqliyyat vasitələrinin parklanmasına görə ödənişlərin yığımı nağdsız olacaq.
Bu barədə İnsanoid bu gün 7 avqust tarixində Report-a istinadən xəbər verir.
Parklanmanın idarə edilməsi üçün mobil tətbiq işə düşəcək. Mobil tətbiqdə parklanma yerlərinin doluluğu ilə bağlı məlumatlar xəritə üzərində rənglərlə nümayiş etdiriləcək. Doluluq 80 %-dən azdırsa, məlumatlar yaşıl rəngdə, 80 %-dən çoxdursa, qırmızı rəngdə olacaq.
Parklanma yerlərini öncədən rezervasiya etmək mümkün olmayacaq.
Dövlət avtomobil yollarında təşkil edilmiş parklanma yerlərinin yeni qaydalar əsasında idarə edilməsi bu sahədə nizam-intizamın yaradılmasına, qanunsuz pul yığımının qarşısını almaqla maliyyə şəffaflığının təmin olunmasına xidmət edir.
"AzParking"in proqram təminatının “Ödənişlər” bölməsi ilə parklanma ödənişlərini etmək olar. Profil bölməsində isə şəxsi məlumatlar, avtomobillər, bank kartları, ödənişlər və fərdi parklanma talonu haqqında informasiya yer alıb.
“Azparking”ə istənilən sayda nəqliyyat vasitəsi əlavə etmək olar.
Tətbiqdəki “Fərdi parklanma talonu” bölməsi vasitəsilə parklanma yerlərinin təşkil edildiyi yolların kənarlarında yerləşən evlərdə və ya binalarda yaşayan minik avtomobilləri istifadəçiləri parklanmadan ödənişsiz istifadə üçün müraciət edə bilərlər. Bunun üçün avtomobil sahibi müvafiq məlumatları dolduraraq müraciət etməlidir.
