Cəlilabadda ölü at ətini mal əti adı altında satan şəxs saxlanılıb. Bu barədə 22 avqust tarixində İnsanoid-ə Daxili İşlər Nazirliyindən (DİN) məlumat verilib.
Qidaya yararsız ölü at ətinin mal əti adı altında satışını təşkil edən rayon sakini Ağalar Mənsimov saxlanılıb.
Müəyyən edilib ki, həmin şəxs Cəlilabad və ətraf ərazilərdən xəstə, təsərrüfatda istifadə edilməyən, ölmüş atları ucuz qiymətə alaraq həyətyanı sahəsində emal edəndən sonra mal əti adı altında satışı ilə məşğul olub.
A. Mənsimovun rayonun Suluçeşmə kəndindəki həyətyanı sahəsindən və saxlanc yerindən qidaya yararsız 1 tondan artıq at əti aşkar olunaraq maddi sübut kimi götürülüb.
Müvafiq ekspertiza nəticəsində həmin ətin qidaya yararsız və insan sağlamlığı üçün ciddi təhlükə mənbəyi olduğu təsdiq edilib.
Faktla bağlı araşdırmalar davam etdirilir.
