Ötən ilin son 4-5 ayında kredit faizlərində artım müşahidə olunub.
Mərkəzi Bankın məlumatına görə, artım cüzi olub və bu, dövlət xəzinə qalığının artımı ilə əlaqəlidir. Ümumiyyətlə, kredit faizlərinin az və ya çox artması dolayı yolla bazar və xidmət sahələrində də qiymət artımına səbəb olur. Yanvar ayından etibarən artıq kredit faizlərində azalma müşahidə olunur.
Bəs görəsən, bundan sonra kredit faizlərində vəziyyət necə olacaq? Artım yoxsa azalma müşahidə olunacaq? Bu artım insanların maliyyə durumuna necə təsir edəcək?
Mövzu ilə bağlı Bakuplus.az–a açıqlama verən bank məsələləri üzrə ekspert Əkrəm Həsənovun sözlərinə görə, kredit faizləri azalmayacaq:
“Kredit faizləri azalmayacaq, böyük ehtimal ilə artacaq. Çünki bazarda kredit riskləri artır. Kreditlərin qaytarılmama və batma ehtimalı yüksəkdir. Digər tərəfdən də qiymət artımı gözlənilir.
Qiymət artımı demək olar ki, başlayıb. İlin əvvəlində Tarif Şurası qiymətləri qaldırıb. Bu banklara da təsir edir. Onlar da faizləri artırmaq istəyir. Belə məqamda, həmçinin milli valyutanın taleyi də çoxlarında şübhə doğurur. Yəni devalvasiya gözləntiləri var. Mən devalvasiyanın olub-olmayacağını deyə bilmərəm. Sadəcə, gözləntilər var. Bu da təsir edir. Banklar faizlərini artırmağa meyilli olacaqlar”.
Nəzrin Vahid
