55 fələstinli qaçqından ibarət ilk qrup İnquşetiyaya gəlib. Bu barədə İnsanoid Rusiya mətbuatına istinadən bu gün, 12 dekabr tarixində xəbər verir.
Regionun rəhbəri və hökumətinin mətbuat xidmətindən bildirilib ki, İnquşetiya Fələstindən olan əllidən çox qaçqını qəbul edib:
"İnquşetiyaya 55 qaçqın gəlib, onlardan 34-ü uşaqdır. Onları hökumətin, Millətlər Nazirliyinin və Rusiya Federasiyası Fövqəladə Hallar Nazirliyinin respublika üzrə Baş İdarəsinin nümayəndələri qarşılayıblar".
Gələnlər Nəzrandakı Assa hotelində yerləşdiriləcəklər. Onlar üçün üç dəfə isti yemək də daxil olmaqla hər cür yaşayış şəraiti yaradılıb.
Respublikanın rəhbəri Mahmud-Əli Kalimatovun tapşırığı ilə hökumət insanlara hər cür köməklik göstərəcək və yaranan problemli məsələləri operativ şəkildə həll edəcək. Tibbi və psixoloji dəstək göstərmək üçün ən yaxşı həkim və psixoloqlar cəlb olunacaqlar.
Mətbuat xidmətinin məlumatına görə, hakimiyyət 100 qaçqını qəbul etmək niyyətindədir.
İnquşetiyada 24 məntəqədə bölgənin şəhər və rayonlarında keçirilən xeyriyyə tədbirləri nəticəsində Fələstin sakinləri üçün 180 tondan çox humanitar yardım və 80 milyon rubla yaxın ianə toplanıb.
