Finlandiyanın keçmiş Prezidenti Martti Ahtisaari vəfat edib. Bu barədə 16 oktyabr tarixində APA Finlandiya Prezidentinin Ofisinə istinadən məlumat yayıb.
Bildirilib ki, 86 yaşlı keçmiş dövlət başçısı Martti Ahtisaari bu gün səhər saatlarında Helsinkidə vəfat edib.
Qeyd edək ki, Martti Oiva Kalevi Ahtisaari 1994-2000-ci illərdə Finlandiya Respublikasının Prezidenti vəzifəsində çalışıb. O, Finlandiyanın onuncu prezidenti idi. Prezidentliyə qədər o, Finlandiya Xarici İşlər Nazirliyində və Birləşmiş Millətlər Təşkilatında bir sıra mühüm vəzifələrdə işləyib.
Prezidentliyindən sonra Ahtisaari sülh vasitəçiliyi təşkilatı CMI - Martti Ahtisaari Sülh Fondunu qurub və beynəlxalq sülh danışıqları və vasitəçilikdə iştirak edib. Sülh naminə uzunmüddətli fəaliyyətinə görə, Prezident Ahtisaari 2008-ci ildə Nobel Sülh Mükafatına layiq görülüb.
