Gürcüstanın Kaxeti bölgəsinin Saqareco rayonunun Tüllər kəndində silahlı insident zamanı ər qətlə yetirilib, onun həyat yoldaşı isə yaralanıb. Bu barədə İnsanoid Gürcüstan mediasına istinadən bu gün, 29 noyabr tarixində xəbər verir.
Hadisənin gecə saatlarında qadının keçmiş həyat yoldaşı tərəfindən törədildiyi güman edilir.
Xeyir Xəbərov hadisəni törətməkdə şübhəli bilinir. İnsident nəticəsində 36 yaşlı Yaşar Cəfərov dünyasını dəyişib.
Kənd sakinlərinin sözlərinə görə, qətldən sonra Xəbərovlar ailəsinin üzvləri kənddən qaçıblar. Onlar, həmçinin qeyd ediblər ki, qadın təxminən 6 ay əvvəl ərindən ayrılaraq Cəfərovun yanına köçüb, buna görə keçmiş əri onları tez-tez hədələyib.
Məlumata görə, təqsirləndirilən şəxs Cəfərova odlu silahdan atəş açıb, o, yerindəcə keçinib, qadın isə xəstəxanaya yerləşdirilib, vəziyyəti ağırdır. Cəfərovun anası da evdə olub və o, xəsarət almayıb.
Faktla bağlı araşdırmalara başlanılıb.
