Hindistanın qərbindəki Qucarat ştatında son 24 saat ərzində ildırım vurması nəticəsində azı 20 nəfər ölüb. Bu barədə 27 noyabr tarixində Report xarici KİV-yə istinadən məlumat verib.
Buna səbəb qeyri-adi güclü tufanlar olub.
“Ştatın müxtəlif şəhərlərində əlverişsiz hava şəraiti və ildırım çaxması nəticəsində çoxlu sayda insan ölümü xəbəri məni dərindən kədərləndirib”, - Hindistanın daxili işlər naziri Amit Şah bildirib.
Qeyd edilib ki, güclü leysan Qucaratın müxtəlif yerlərində əkin sahələrinə ziyan vurub. Hindistan Meteorologiya Departamenti ştatın müxtəlif bölgələrində 16 saat ərzində 50 mm-dən 117 mm-ə qədər yağıntı qeydə alındığı barədə məlumat yayıb.
