Elan saytlarında iş axtaran vətəndaşlara mövcud olmayan vakansiyalar təklif edərək onların pulunu dələduzluq yolu ilə ələ keçirən Sərəstan Bəşirov saxlanılıb. Bu barədə Daxili İşlər Nazirliyi mayın 4-də məlumat verib.
Sözügedən şəxs elan saytlarında özünü Emin Hüseynov kimi təqdim edərək dövlət qurumlarının adından namizədlərin qəbulu barədə saxta elanlar yerləşdirib. S.Bəşirov işlə bağlı onunla əlaqə saxlayan hər kəsdən sığorta haqqı adı ilə pul vəsaitləri alıb. O, dələduzluq edərək 200-dən çox vətəndaşın pulunu ələ keçirib.
Faktlarla bağlı araşdırmalar davam edir.
Saxlanılan şəxsin qanunsuz əməllərindən zərərçəkən digər vətəndaşlar varsa, Daxili İşlər Nazirliyinə, "102" Xidməti-Zəng Mərkəzinə və ya Nazirliyin rəsmi səhifələrinə məlumat verə bilərlər.
