İlk türk astronavt Alper Gezeravcı yanvarın 19-u Türkiyə saatı ilə saat 00:49-da kosmosa yola salınıb. Bu barədə 19 yanvar tarixində Report məlumat verib.
Alper Gezeravcının olduğu “Dragon” kapsulu “Falcon 9” daşıyıcı raketi vasitəsi ilə NASA-nın Floridadakı Kennedi Kosmik Mərkəzindən Beynəlxalq Kosmik Stansiyaya göndərilib.
“Ax-3” heyətinə türk astronavtla yanaşı, ispaniyalı astronavt Michael Lopez-Alegria, İtaliya Hərbi Hava Qüvvələrinin pilotu Valter Villadei və Avropa Kosmik Agentliyi adından isveçli kosmonavt Markus Vandt daxildir.
Türk astronavt Beynəlxalq Kosmik Stansiyada 14 gün qalacaq və 13 fərqli elmi təcrübə aparacaq. Təcrübələrin inteqrasiyası və adaptasiya işləri Türkiyənin Elmi və Texnoloji Tədqiqat Şurası (TÜBİTAK), “Axiom Kosmos” və NASA ilə koordinasiyalı şəkildə aparılacaq.
Alper Gezeravcı Hərbi Hava Qüvvələri üzrə mühəndislik təhsili alıb. Türkiyə Hərbi Hava Qüvvələrində döyüş pilotu kimi xidmət edən polkovnikin bir çox təyyarələrdə 15 illik uçuş təcrübəsi var. O, həmçinin yeddi il “Türk Hava Yolları”nda kapitan pilot vəzifəsində çalışıb.
Gezeravcının kosmosdakı ilk sözləri "İstikbal göklerdedir" oldu. Qeyd edək ki, bu sözlər Türkiyə Respublikasının qurucusu və ilk prezidenti Mustafa Kamal Atatürkə məxsusdur.
[playlist type="video" tracklist="false" ids="159338"]
