Kürdəmirdə 7 məktəbdə şagirdlər arasında qızılca yayılıb, 9 nəfər xəstəxanaya yerləşdirilib. Bu barədə 27 noyabr tarixində Report Mərkəzi Aran Regional Təhsil İdarəsinə istinadən məlumat verib.
Qızılca xəstəliyi ilə bağlı yoluxma halı Kürdəmir rayonunun 1 nömrəli, Atakişili, Sor-Sor, Pirili, Ərəbqubalı, Şilyan və Qarasaqqal kənd tam orta məktəblərinin şagirdləri arasında aşkarlanıb.
9 şagird hazırda stasionar şəraitdə müalicə alır, digər yoluxanların müalicəsi ambulator (ev şəraitində) şəraitdə davam etdirilir, vəziyyətləri stabildir.
“Kəskin yoluxma faktı olmadığı üçün həmin məktəblərin bağlanılması ilə bağlı qərar qəbul edilməyib”, - məlumatda qeyd olunub.
Mərkəzi Aran Regional Təhsil İdarəsi hazırda aidiyyəti olaraq ümumi təhsil müəssisələrinə müvafiq tapşırıqlar verib, xəstəliyin simptomları aşkar olunan şagirdlərin dərhal xəstəxanaya müraciət etməsi, eyni zamanda qızılca əleyhinə peyvənd olunmaları tövsiyə olunub.
