“Qazi” adından istifadə edərək qanunsuz olaraq torpaq sahələrini zəbt edib obyekt tikmək istəyən Şəhriyar Mirzəyev özünə xəsarət yetirib. Bu barədə İnsanoid Oxu.az-a istinadən bu gün, 23 may tarixində xəbər verir.
Hadisə ötən gün axşam saatlarında baş verib.
Şəhriyar 10-a yaxın hərbi formalı “müharibə veteranı” ilə birgə Səbail rayonunun Bayıl yaşayış massivindəki Arif İsmayılov küçəsində torpaq sahəsini zəbt etməyə çalışıb.
Həmin torpaq sahəsi isə “Bibiheybətneft” Neft və Qaz Çıxarma İdarəsinə (NQÇİ) məxsusdur.
Onlar 2976 saylı neft quyusuna bitişik olan torpaq sahəsində qanunsuz obbyekt tikməyə cəhd göstəriblər. Tikinti işlərini qısa müddətdə yekunlaşdırmaq məqsədi ilə gecə saatlarında əraziyə xeyli sayda işçi qüvvəsi cəlb edilib.
Ərazidə çalışan mühafizəçilərin Daxili İşlər Nazirliyinin “102” xidmətinə və Səbail Rayon İcra Hakimiyyətinə məlumat verməsindən sonra tikintiyə müdaxilə edilib.
Özünü qazi kimi təqdim edən Şəhriyar Mirzəyev əraziyə dair heç bir sənədi olmasa da, tikinti üçün icazəsinin olduğunu bildirib. Bundan sonra yarımtikilinin söküləcəyi təqdirdə özünə xəsarət yetirəcəyini bildirib.
Sözügedən ərazidə aparılmış hörgü işləri sökülüb. Bu zaman Mirzəyev üzərində gəzdirdiyi bıçaqla qollarını kəsərək özünə xəsarət yetirib.
Şəhriyar Mirzəyev 2023-cü ilin noyabr ayında da neft mədəninin ərazisində özbaşına obyekt tikintisi həyata keçirməyə çalışıb. Qanunsuz əməlinin qarşısı alınıb, tikili sökülüb.
