Qırğızıstan və Tacikistan arasında dövlət sərhədinin 47 km-dən çox hissəsi razılaşdırılıb. Bu barədə 14 dekabr tarixində Report Qırğızıstan Nazirlər Kabinetinə istinadən məlumat verib.
Bildirilib ki, tərəflərin mütəxəssisləri və rəsmilərindən ibarət işçi qrupunun dekabrın 8-dən 14-dək Qırğızıstanın Batken vilayətinin Batken şəhərində keçirilən birgə iclasında dövlət sərhədinin daha 47 kilometri razılaşdırılıb. Görüşdən sonra uyğun protokol imzalanıb.
Məlumata görə, növbəti görüşün Tacikistan ərazisində keçirilməsi ilə bağlı razılıq əldə olunub.
Bir müddət əvvəl Qırğızıstan Milli Təhlükəsizlik Dövlət Komitəsinin rəhbəri Kamçıbek Taşiyev bildirmişdi ki, Bişkek və Düşənbə artıq iki ölkə arasında sərhəd xəttinin təxminən 90%-i barədə razılığa gəliblər. Qeyd edək ki, iki ölkə arasında dövlət sərhədinin uzunluğu təqribən 980 kilometrdir. Sərhədlərin qeyri-müəyyənliyi yerli sakinlər və hərbçilər arasında dəfələrlə qarşıdurmaya səbəb olub. 2014-cü ildən bəri Qırğızıstan - Tacikistan sərhədində 10-dan çox ciddi münaqişə baş verib, ölənlər olub.
