Qvineyanın sabiq Prezidenti Musa Dadis Kamara həbsxanadan qaçıb. Bu barədə 4 noyabr tarixində APA xarici KİV-yə istinadən məlumat verib.
Bu gün səhər bir qrup silahlı şəxs paytaxt Konakrinin inzibati mərkəzindəki həbsxanaya basqın ediblər. Həbsxanadan qaçmağa müvəffəq olan bir neçə məhbusun arasında Kamara da olub.
Qeyd edək ki, Musa Kamara və onun bir neçə tərəfdarı müxalifət üzvlərinin qətlinə görə həbs ediliblər.
Xatırladaq ki, 2008-ci ilin dekabr ayında Kamara Qvineyada hərbi çevrilişə rəhbərlik edib və prezident elan edilib. 2009-cu ilin sentyabrında Konakridə stadionlardan birində Kamara hökuməti əleyhinə nümayişdə iştirak edən 156 nəfər öldürülüb.
Həmin ilin dekabrında Kamaraya qarşı sui-qəsd törədilib və o, ağır xəsarətlərlə Mərakeşdəki xəstəxanaya aparılıb.
2010-cu ilin yanvarında Qvineyadan kənarda olan Kamara ölkəni idarə etməkdən imtina etdiyini və ölkəsinə geri dönməyəcəyini elan edib. Ötən ilin sentyabrında Kamara gözlənilmədən Qvineyaya səfər edərək, özünün və hökumətinin 11 üzvünün məhkəməsində iştirak edəcəyini bildirib.
Musa Dadis Kamara israrla bildirib ki, paytaxt stadionunda törədilən qətllə heç bir əlaqəsi yoxdur
