Böyük Britaniyanın Baş naziri Rişi Sunak Britaniya və ABŞ-nin husilərə birgə zərbə endirməsi ilə bağlı danışıb. Bu barədə 12 yanvar tarixində APA xəbər verir.
"Son aylarda husilər Qırmızı dənizdə kommersiya gəmiçiliyinə qarşı bir sıra təhlükəli və sabitliyi pozan hücumlar həyata keçirib, eyni zamanda, Böyük Britaniyaya məxsus və digər beynəlxalq gəmiləri təhdid edərək, həyati əhəmiyyətli ticarət marşrutunda böyük maneələrə səbəb olublar və bu, nəticədə əmtəə qiymətlərinin artmasına səbəb olub.
Onların məsuliyyətsiz hərəkətləri dənizdə insanların həyatını riskə atmağa və Yəməndə humanitar böhranı daha da dərinləşdirməyə xidmət edir", - Rişi Sunak deyib.
Baş nazir Sunak deyib ki, Britaniyanın Kral Hərbi Hava Qüvvələri Yəməndə husi üsyançılarının istifadə etdiyi hərbi obyektlərə hədəfli zərbələr endirib.
Britaniya hökumət başçısı xatırladıb ki, beynəlxalq ictimaiyyətin xəbərdarlıqlarına baxmayaraq, husilər bu həftə Qırmızı dənizdə Böyük Britaniya və ABŞ hərbi gəmilərinə qarşı hücumlar həyata keçirməyə davam ediblər.
Rişi Sunak prosesin belə davam edə bilməyəcəyini və ölkəsinin hər zaman naviqasiya azadlığını və ticarətin azad axınını müdafiə edəcəyini bəyan edib: "Buna görə də biz husilərin hərbi imkanlarını zəiflətmək və qlobal gəmiçiliyi qorumaq üçün bu hücumlarla bağlı hədəflərə qarşı Niderland, Kanada və Bəhreynin qeyri-operativ dəstəyi ilə ABŞ ilə birgə özünümüdafiə üçün məhdud, zəruri və mütənasib tədbirlər gördük”.
"Böyük Britaniya və ABŞ Yəməndə husilərin hərbi obyektlərinə hədəfli zərbələr endirib. Böyük Britaniya gəmilərinin təhlükəsizliyi və Qırmızı dənizdə naviqasiya azadlığı hər şeydən vacibdir və buna görə də biz tədbirlər görürük.
BMT Təhlükəsizlik Şurasının da bəyan etdiyi kimi, husilər Qırmızı dənizdəki hücumları dayandırmalıdır", - Britaniyanın xarici işlər naziri Devid Kemeron "X" hesabında vurğulayıb.
