Rusiyanın "Birinci kanalı"nın sabiq redaktorunun 8,5 il müddətinə azadlıqdan məhrum edilməsi barədə qərar qəbul edilib. Bu barədə 4 oktyabr tarixində APA məlumat verib.
Sabiq redaktor Rusiya Silahlı Qüvvələri haqqında yalan məlumat yaymaqda təqsirli bilinib.
Bununla yanaşı, məhkəmə qərarına əsasən, Marina Ovsyannikova 4 il müddətinə elektron və ya informasiya-telekommunikasiya şəbəkələrinin, o cümlədən internet saytlarının administrasiyası ilə bağlı fəaliyyətlə məşğul olmaq hüququndan məhrum edilib.
Xatırladaq ki, o, ötən il 15 iyulda özünə məxsus media resursunda Rusiya Silahlı Qüvvələri hərbçiləri barədə bilərəkdən yalan məlumatı əks etdirən video və foto yayımlayıb. Barəsində ev dustaqlığı qərarı çıxarıldıqdan sonra 2022-ci ilin oktyabrında ev dustaqlığından qaçıb. Hazırda harada olduğu məlum deyil və bu səbəbdən beynəlxalq axtarışa verilib.
