Şəmkirdə odlu silah və onun komplekt hissələrini satmaqda şübhəli bilinən rayon sakini Famil İsmayılov saxlanılıb. Bu barədə İnsanoid DİN-ə istinadən bu gün, 22 yanvar tarixində xəbər verir.
Şübhəli şəxsin yaşadığı evə baxış keçirilən zaman orada 1 ədəd atəşə yararlı “Kalaşnikov” avtomatı, 1 ədəd həmin avtomata məxsus daraq və 13 ədəd 7,62 mm-lik patron aşkar edilib. F. İsmayılov ifadəsində silahı bir müddət əvvəl tapdığını və satmaq məqsədilə saxladığını etiraf edib.
Bundan başqa, Şəmkir Rayon Polis Şöbəsinin Kür Polis Bölməsi əməkdaşlarının keçirdikləri digər əməliyyat-axtarış tədbirləri nəticəsində qanunsuz olaraq narkotik vasitə əldə edib saxlamaqda şübhəli bilinən rayon sakini Rəşad Rzayev də saxlanılıb. Şübhəli şəxsin üzərindən və yaşadığı evdən marixuana aşkar edilərək götürülüb.
Aşkar edilən maddi sübutlar müvafiq ekspertizaya təqdim olunub, faktlarla bağlı araşdırmalar davam etdirilir.
