Vətəndaşları "kreditə qızıl satılır" adı altında kiberüsullarla talayan dəstə üzvləri saxlanılıblar. Bu barədə İnsanoid-ə 29 avqust tarixində Daxili İşlər Nazirliyindən məlumat verilib.
“Kreditə qızıl satılır” başlığı altında, xüsusən TikTok sosial şəbəkəsində yerləşdirilən şirnikləndirici elanlarla vətəndaşları aldatmaqda şübhəli bilinən növbəti şəbəkənin üzvləri, əvvəllər məhkum olunmuşlar – 39 yaşlı Elvin Həsənov, 35 yaşlı Loğman Zayidov və 38 yaşlı Ceyhun Kərimov polis əməkdaşları tərəfindən müəyyən olunaraq saxlanılıblar.
Həmin şəxslərin feyk səhifə və profillərində talamaya məruz qalanların dairəsi müəyyən olunub və qrupun bütün qanunsuz fəaliyyəti aşkarlanıb.
Dəstə üzvləri vətəndaşların müxtəlif məbləğlərdə pul vəsaitlərini onlayn köçürmə formasında ələ keçiriblər. Onlar izi itirmək məqsədilə “kreditə qızıl” almaq üçün onlara pul köçürən şəxslərin hesablarını sonradan bloklayıblar və həmin vəsaitləri şəxsi hesablara köçürərək nağdlaşdırıblar. Dəstə üzvləri bu qanunsuz əməlləri ilə 150-dən artıq şəxsə maddi ziyan vurduqlarını etiraf ediblər.
Digər bir əməliyyat nəticəsində paytaxtda ayrı-ayrı vətəndaşlara məxsus bank kartlarından müxtəlif məbləğlərdə pul oğurlayan 22 yaşlı Kənan Bədirli müəyyən olunaraq saxlanılıb. O, qeyri-qanuni vasitələrlə ələ keçirdiyi kart məlumatlarını müxtəlif mobil tətbiqlərdə qeydiyyatdan keçirib. Daha sonra K. Bədirli pul vəsaitlərini onlayn yolla öz hesabına transfer edərək silsilə oğurluqlar edib.
Hazırda saxlanılan şəxslər barəsində araşdırmalar davam etdirilir.
