Twitter özünə rəqib kimi görünən “Threads” adlı yeni sosial şəbəkənin istifadəyə verilməsinə görə “Meta”nı məhkəməyə verə bilər. Bu barədə 7 iyul tarixində Report "Semafor" portalına istinadən məlumat yayıb.
Məlumata görə, iyulun 6-da yeni onlayn platformanın istifadəyə verilməsindən qısa müddət sonra “Twitter”i təmsil edən “Quinn Emanuel” şirkətinin hüquqşünası Aleks Spiro “Meta”nın rəhbəri Mark Zukerberqə məktub göndərib və orada korporasiyanı “Twitter”in əqli mülkiyyətindən istifadədə ittiham edib.
Xüsusilə, Spiro, keçən il İlon Mask tərəfindən satın alındıqdan sonra şirkətin ixtisarı zamanı “Meta”nın hələ də ticarət sirri məlumatlarına çıxışı olan onlarla “Twitter” işçisini işə götürdüyünə diqqət çəkib.
"Twitter öz əqli mülkiyyət hüquqlarını ciddi şəkildə tətbiq etmək niyyətindədir və “Meta”dan şirkətin kommersiya sirri olan hər hansı məlumatdan istifadəni dayandırmaq üçün dərhal addımlar atmasını tələb edir", - məktubda deyilir.
