Vətəndaşlara “Bravo” supermarketlər şəbəkəsinin adından keçirilən “fişinq” kampaniyası ilə bağlı xəbərdarlıq edilib. Bu haqda aprelin 22-də Elektron Təhlükəsizlik Xidməti məlumat yayıb.
Belə ki, istifadəçilərə onların fərdi məlumatlarını ələ keçirmək üçün “WhatsApp” üzərindən sözügedən şirkət adından mesajlar göndərilir. İnsanlara yeni filialın açılması münasibətilə 400 manatlıq hədiyyə kuponu vəd olunur və göndərilən linkə daxil olaraq “sorğu”da iştirak etmələri istənilir.
Keçidə daxil olanlar həmin şirkətin rəsmi səhifəsinə oxşar saxta səhifəyə yönləndirilir və mesajı digərlərinə göndərməsi tələb olunur.
“Bu kimi kiberhücumlarda məqsəd saxta reklam baxışları toplamaqla asan yolla gəlir əldə etmək, istifadəçilərin fərdi məlumatlarını ələ keçirməkdir”, - məlumatda qeyd edilib.
Kiberhücumlardan qorunmaq üçün linkə daxıl olaraq təhlükəsizlik qaydaları ilə tanış olmaq mümkündür.
