Yeni il bayramında yanğın təhlükəsizliyi qaydaları ilə əlaqədar Fövqəladə Hallar Nazirliyi (FHN) əhaliyə müraciət edib. Bu barədə FHN məlumat yayıb.
Bildirilib ki, küknar ağacı ətrafında keçirilən bayram tədbirləri həm də yanğın təhlükəsi yaradır. Fövqəladə Hallar Nazirliyi əhaliyə, o cümlədən yeni il şənliklərinin keçiriləcəyi məkanların rəhbərlərinə müraciət edərək, aşağıdakı yanğın təhlükəsizliyi qaydalarına riayət etməyin vacibliyini xatırladır:
- Evlərdə və şənlik məkanlarında bəzədilən küknar ağacı yerə möhkəm bərkidilməli, ağacın budaqları tavana və divarlara toxunmamalı;
- İşıqlandırmada saz və standarta uyğun elektrik qurğu və cihazından istifadə edilməli;
- Ağac tezalışan oyuncaqla bəzədilməməli;
- Qapalı məkanda atəşfəşanlıq edilməməlidir.
Bundan başqa, bayram şənliyində aşağıdakılar nəzərə alınmalıdır:
- Şənlik ikinci mərtəbədən yuxarıda keçirilməməli;
- Şənlik keçirilən otağın divar, tavan və döşəməsi odadavamlı olmalı;
- Pəncərədə dəmir barmaqlıq olmamalı;
- Məkanın iki çıxışı olmalı;
- Ehtiyat qapı üzərində “Çıxış” sözü yazılmış yaşıl işıqlı elektrik lövhəsi olmalı;
- Ehtiyat çıxış yollarında sərbəst çıxışa mane olan heç nə olmamalı;
- Təxliyə yolları işıqlandırılmalı və birbaşa çıxışa aparmalı;
- Otağın qapıları mütləq bayıra açılmalı;
- Məkanda nəzərdə tutulan saydan artıq insan olmamalı;
- Şənlikdə işıq tam söndürülməməli;
- Şənliyə tezalışan materialdan paltar geyinilməməli;
- Məkan ilkin yanğınsöndürmə vasitələri ilə təmin olunmalıdır.
Həmçinin bildiririk ki, qanunvericiliyə əsasən, mülkiyyət formasından asılı olmayaraq, tədbir keçirilən bütün obyekt və müəssisələrin rəhbərləri yanğın təhlükəsizliyinin təmin edilməsinə cavabdehlik daşıyırlar. Belə ki, tədbir ərəfəsində obyektin yanğından mühafizə sisteminə aid bütün qurğu, avadanlıq və s. təftiş edilməli, onların sazlığı təmin olunmalı, habelə obyektin bütün işçiləri yanğına qarşı təlimatlandırılmalı və baş verə biləcək yanğın hadisəsi zamanı vəzifələrini dəqiq bilməlidirlər.
[playlist type="video" tracklist="false" ids="156548"]
