İnsanoid Azərbaycanda məşğul ola biləcəyiniz bir neçə ekstremal idman növü haqda araşdırma aparıb:
Əsl adrenalin hissini yaşamaq istəyənlər yamac paraşütü ilə uçuş həyata keçirə bilərlər. “AirGame Paraglading”də solo təlim və tandem uçuş xidmətləri mövcuddur.
Solo - 1 ay davam edən təlimdir. Təlimi bitirən şəxs müəyyən yüksəkliklərdə uyğun külək limitləri daxilində tək uçuş edə bilər. Qiymət: qrupda (4 - 6 nəfər) 500 manat, fərdi isə 1 000 manatdır. Ödənişi hər mərhələ üçün ayrı-ayrılıqda, 3 taksitlə ödəmək də mümkündür. Uçuş təlimi Pirəkəşkül, Qobustanda keçirilir.
Tandem - təcrübəli pilotla birlikdə eyni paraşütdə edə biləcəyiniz uçuş növüdür. Hər hansısa təcrübəyə gərək yoxdur. Qırızdəhnədə (Quba) uçuş üçün 150, Beşbarmaqda (Siyəzən) isə 100 manat ödəmək lazımdır.
Qeyd edək ki, GoPro kamerası ilə edilən çəkiliş müştəriyə hədiyyə olaraq təqdim edilir.
View this post on Instagram
Yaxınlaşan qızmar yay günlərində Xəzər sahillərində dənizdə üzməklə yanaşı, vindsörfinq üzrə məşğələlərə də qatılmaq olar. Mərkəz Şıxov çimərliyində “Ramada” və “Mambo Beach” ərazisində yerləşir. Təlim 2 saat davam edir. 30 - 45 dəqiqə sahildə nəzəriyyə dərsi keçirilir, qalan müddət isə dənizdə praktikaya həsr olunur.
Başlanğıc dərsdə 2 - 3 nəfərdən ibarət qrup olur. Qiymət bir nəfər üçün 60 manatdır. Bu qiymətə hotel xidmətlərindən faydalanmaq da daxildir (hovuz, çimərlik, geyinmə-soyunma otağı, duş, dəsmal).
View this post on Instagram
Bakıda dayvinq idman növü ilə də məşğul olmaq olar. İyundan oktyabr ayınadək dənizdə sualtı gəzinti təşkil edilir. Qiymət şəkil və video ilə birgə 60 manatdır. Yaya qədər isə dərslər Su İdmanı Sarayında 6 metrlik hovuzda keçirilir. Qiymət 100 manatdır.
5 günlük kurs (3 gün nəzəriyyə, 2 gün təcrübə) keçənlərə beynəlxalq sertifikat verilir. Onlara, həmçinin yayda dənizdə 2 sualtı gəzinti pulsuz təşkil edilir. Kurs müddətində lazım olan bütün avadanlıq, çəkiliş daxil qiymət 600 manatdır.
View this post on Instagram
Hündürlükləri, zirvələri fəth etməyi sevənlər “Explore Mountains” komandası ilə yürüşlərdə iştirak edə bilərlər. 28 - 29 may tarixlərində 3 740 metr hündürlükdə yerləşən Cümhuriyyət zirvəsinə tur keçiriləcək. Zirvəyə uğurla çıxmış bütün iştirakçılara sertifikat verilir. Qiymət bir nəfər üçün 170 manatdır.
İyunda, həmçinin Zəfər zirvəsinə (4 301 metr) və Türkiyədə Ağrı dağına (5 137 metr) yürüş təşkil ediləcək.
View this post on Instagram
Qəzalar və bədbəxt hadisələrin qarşısını almaq üçün təhlükəsizlik qaydalarına riayət etməyi unutmayın. Dərslər ərzində təlimatçıların köməyindən istifadə edin.
