Qarşıdakı 20 ildə Azərbaycanın işğaldan azad edilmiş ərazilərində uzunluğu 1500 kilometrə yaxın yollar inşa ediləcək. Bunu 24 dekabrda rəqəmsal inkişaf və nəqliyyat naziri Rəşad Nəbiyev keçirilən "Qarabağ: Cənubi Qafqazdan dünyaya açılan yeni mənzərə" adlı elmi-praktiki konfransda söyləyib.
“Hazırda sözügedən istiqamətdə xüsusi konsepsiya hazırlanır. 101 kilometr uzunluqda Zəfər Yolu artıq istifadəyə verilib və digər 15 yol layihəsi də ardıcıl olaraq tamamlanacaq", - deyə nazir bildirib.
Həmçinin o əlavə edib ki, bu günə qədər işğaldan azad edilmiş ərazilərin 52%-nin mobil internet şəbəkəsi bərpa edilib.
“Əgər 1998-ci ildən etibarən baxsaq, yalnız 2016-cı ildə ölkə üzrə mobil şəbəkəni (işğal olunmuş ərazilər istisna olmaqla) 95% təmin etməyə nail olmuşduq. Amma qısa müddətdə 52%-lik nəticə əldə etdik. Bu, böyük uğurdur və biz həm sabit həm də mobil şəbəkə ilə bağlı işləri davam etdirəcəyik”, - deyə Rəşad Nəbiyev qeyd edib.
