Bu günə kimi işğaldan azad edilmiş ərazilərin bərpası ilə bağlı sahibkarlardan 921 müraciət daxil olub. Onlardan 283-ü xarici şirkətlərdir. Bu haqda iqtisadiyyat naziri Mikayıl Cabbarovun Azərbaycan-Türkiyə-Gürcüstan biznes forumundakı çıxışına istinadən Report xəbər verib.
“Azərbaycan bərpa prosesini təkbaşına aparmır, dost ölkələrin şirkətləri ilə birgə həyata keçirir. Türkiyə şirkətləri üstünlük təşkil edir. Gürcüstandan da müraciətlər daxil olur”, - deyə nazir bildirib.
Onun sözlərinə görə, Türkiyədən daxil olmuş 14 investisiya təklifinin məbləği 6,5 milyard manata çatır. Həmçinin Mikayıl Cabbarov əlavə edib ki, Ağdam Sənaye Parkına və Araz Vadisi İqtisadi Zonasına investorlar tərəfindən böyük maraq var.
Azərbaycan-Türkiyə-Gürcüstan biznes forumu bu gün başlayıb və iki gün davam edəcək. Tədbirdə regional iqtisadi layihələrin perspektivləri, ölkələr arasında əməkdaşlığın genişləndirilməsi, sərmayə qoyuluşu və s. məsələlər müzakirə edilir.
