Amnistiya Aktının icrasına başlanılan gündən indiyədək 1 500-ə yaxın məhkum azadlığa buraxılıb. Bu barədə noyabrın 24-də Baş Prokurorluğun nümayəndəsi Elnur Musayev bildirib.
Məlumata əsasən, məhkumların 78%-i Bakı, 8%-i Salyan, 3%-i Sumqayıt, qalanı isə digər bölgələrdə yerləşən cəzaçəkmə müəssisələrindəndirlər.
Nümayəndənin sözlərinə görə, Amnistiya daha çox 31-40 yaş arasında olan məhkumlara şamil edilib. Sayına görə ikinci yeri 41-50 yaş qrupu təşkil edib. Amnistiya Aktında 18 yaşından 25 yaşadək olan şəxslərin sayı 8%-dir. Amnistiyanın tətbiq edildiyi ən az saylı yaş qrupu 60-dır.
Həmçinin bugünədək Amnistiya beş xarici vətəndaşa da tətbiq olunub.
“Azad edilən məhkumların yarısından çoxu mülkiyyət əleyhinə və narkotiklərin qanunsuz dövriyyəsi ilə bağlı cinayətlərə görə həbs ediliblər”, - deyə E. Musayev vurğulayıb.
Bununla yanaşı, Amnistiya Aktı nəqliyyat vasitələrinin istismarı qaydaları əleyhinə, həyat və sağlamlıq əleyhinə olan cinayətlər törədən şəxslərə tətbiq edilib.
8 Noyabr – Zəfər Gününün ildönümü ilə əlaqədar Milli Məclisə təqdim edilən Amnistiya Aktının 16 mindən çox şəxsə şamil ediləcəyi gözlənilir. Azadlığa buraxılması nəzərdə tutulanların sayı təxminən 3 min nəfərdir.
