Dünən, martın 11-də Bolqarıstanın Plovdiv şəhərində 23 yaşadək güləşçilərin Avropa çempionatının növbəti qarşılaşmaları keçirilib.
Azərbaycanın qadın güləşçisi Jalə Əliyeva (62 kq) finalda serbiyalı rəqibə qalib gələrək Avropa çempionu adını qazanıb. Beləliklə, turnirdə qadın güləşçilərin çıxışına yekun vurulub. Nəticədə 6 qadın güləşçimizdən 4-ü medal qazanıb və komanda hesabında yığmamız 5-ci yerə layiq görülüb.
Dünən, həmçinin sərbəst güləşçilərimiz mübarizəyə qoşulub. Onlardan 4-ü bu gün medal uğrunda güləşəcək. Zirəddin Bayramov (65 kq) finalda erməni, İslam İlyasov (97 kq) isə alman rəqibi ilə üz-üzə gələcək. Tofiq Əliyev (57 kq) və Əşrəf Aşırov (79 kq) isə müvafiq olaraq bolqar və alman rəqiblərinə qarşı bürünc mükafat uğrunda güləşəcək.
Yarışlara 13 mart tarixində yekun vurulacaq.
