Mahir Məmmədov Azərbaycanın Şahmat Federasiyasının (AŞF) yeni prezidenti seçilib. Bu barədə noyabrın 26-da Gənclər və İdman Nazirliyindən məlumat verilib.
Mahir Məmmədov 2005-ci ildən AŞF-nin vitse-prezidenti vəzifəsində çalışıb, 2018-ci ildə isə Beynəlxalq Şahmat Federasiyasının vitse-prezidenti seçilib.
Yeni federasiya prezidenti Azərbaycan Mərkəzi Bankının sədri Elman Rüstəmovu əvəzləyib. Elman Rüstəmov 2007-ci ildən Azərbaycan Şahmat Federasiyasına rəhbərlik edib.
Faiq Həsənov federasiyanın I vitse-prezidenti, Seymur Talıbov isə vitse-prezident kimi işini davam etdirəcək. Eyni zamanda dünyasını dəyişən azərbaycanlı qrosmeyster Vüqar Həşimovun qardaşı Sərxan Həşimov və beynəlxalq qrosmeyster Cahangir Ağarəhimov İcraiyyə Komitəsinə üzv seçilib.
