"Google maps"də Qarabağ bölgəsinin bəzi rayonlarının saxta adlarla erməni dilində göstərilməsi ilə bağlı Azərbaycan "Google" şirkəti qarşısında məsələ qaldırıb. Bunu dekabrın 23-də Xarici İşlər Nazirliyinin rəsmisi Leyla Abdullayeva bildirib.
Şirkət rəhbərliyinə ölkəmizin müvafiq ərazilərinin rəsmi coğrafi adlarının siyahısı göndərilib. Qeyd edilib ki, cari ilin may ayında Azərbaycan BMT-yə milli hesabat təqdim edib. Bu sənəddə 4589 yaşayış məntəqəsinin azərbaycan, ingilis və rus dillərində rəsmi adlarını əks etdirilib. Həmçinin hesabatda Ermənistan tərəfindən işğal dövründə adları dəyişdirilmış 125 coğrafi obyektimizin adları göstərilib.
“BMT-nin qətnamələrinə görə hər hansı bir dövlətin qurumu coğrafi adlara dəyişiklik edə bilməz. Bu kimi dəyişikliklər BMT tərəfindən də tanına bilməz”, - deyə Leyla Abdullayeva vurğulayıb.
Onun sözlərinə görə, "Google maps" istifadəçilərin fərdi müraciətləri prinsipi əsasında işləyir. Bu baxımdan vətəndaşlarımızın, qeyri-hökumət qurumlarının mövzu ilə bağlı fikirlərini şirkətə yazmaları çox önəmlidir.
