Azərbaycan Prezidenti İlham Əliyev və Xarici İşlər Nazirliyi noyabrın 26-da Rusiyaya Kemerovo vilayətindəki şaxtada baş vermiş partlayışla bağlı başsağlığı verib.
“Xalqımız adından və şəxsən öz adımdan Sizə, həlak olanların doğmalarına qəlbdən başsağlığı verirəm, yaralıların tezliklə sağalmalarını arzu edirəm”, - deyə dövlət başçısının başsağlığında bildirilir.
Partlayış noyabrın 25-də səhər saatlarında "Listvyajnaya" mədənində baş verib. Qəza zamanı şaxtada ümumilikdə 287 insan olub. Son məlumata görə, hadisə nəticəsində 52 nəfər həlak olub. Yaralananların sayı 63-ə çatıb. İddia edilir ki, insidentin səbəbi metanın partlayışı olub.
Faktla bağlı cinayət işi açılıb. Bildirilir ki, şaxtanın direktoru, onun birinci müavini və bölmə rəisi saxlanılıblar.
Vəfat edənlərin sayına görə, sözügedən qəza son 11 ildə Rusiya şaxtalarında ən böyük hadisəyə çevrilib. Miqyasına görə ən son belə hadisə 2010-cu ildə “Raspadskaya” mədənində baş vermişdir. O zaman iki partlayış nəticəsində 91 nəfər həyatını itirmişdir.
