Azərbaycanda cari ilin ilk 10 ayında 2,053 milyard dollar məbləğində qeyri-neft məhsulları ixrac olunub. Bu da ötən ilin eyni dövrü ilə müqayisədə 42% çoxdur. Bu barədə Dövlət Gömrük Komitəsinin 29 noyabr tarixində dərc olunan hesabatında deyilir.
Qeyri-neft məhsullarının ixracının 75%-i Rusiya, Türkiyə, İsveçrə, Gürcüstan və ABŞ-ın payına düşür. Sözügedən məhsullarının ixracında əsas mallar meyvə-tərəvəz, plastmassa və onlardan hazırlanan məmulatlar, pambıq lifi, kimya sənayesi məhsulları və alüminiumdur. Bu məhsullar ixracın təxminən 66%-ni təşkil edir.
Qeyd edək ki, ötən illə müqayisədə meyvə-tərəvəzin ixracının dəyəri dəyişməsə də, plastmassanın ixracı demək olar 2,7 dəfə, pambıq lifinin ixracı 70%-dən çox, kimya sənayesi məhsullarının ixracı 2,3 dəfə, alüminiumun ixracı isə 62% artıb.
