Noyabrın 28-də Aşqabadda Prezident İlham Əliyevin İran İslam Respublikasının Prezidenti Seyid İbrahim Rəisi və Türkmənistan Prezidenti Qurbanqulu Berdiməhəmmədov ilə görüşü olub. Bu barədə Azərbaycan Prezidentinin mətbuat xidməti xəbər verib.
Türkmənistanın paytaxtında üç ölkə arasında qaz nəqlinə dair müqavilə imzalanıb. Sənədə əsasən, il ərzində Türkmənistandan Azərbaycana İran üzərindən 1,5-2 milyard kubmetr qaz ötürüləcək.
“İmzalanmış sənəd üçtərəfli əməkdaşlıq üçün çox gözəl zəmindir və bizim niyyətimizi göstərir. Müqavilənin iqtisadi və enerji təhlükəsizliyi baxımından da çox böyük önəmi var”, - deyə İlham Əliyev vurğulayıb.
Görüşdə Azərbaycan ilə İran arasında Şimal-Cənub və Zəngəzur nəqliyyat dəhlizləri çərçivəsində əməkdaşlıq məsələləri müzakirə edilib. Həmçinin Azərbaycan, Rusiya və İran arasında enerji qovşağının yaradılması müzakirə olunub.
Azərbaycan Prezidenti noyabrın 28-də İqtisadi Əməkdaşlıq Təşkilatının 15-ci Zirvə Toplantısında iştirak etmək üçün Türkmənistanda səfərdə olub.
