Azərbaycanda 2021-ci ilin yanvar-noyabr ayları ərzində 31,6 milyon ton neft hasil edilib. Bu göstərici ötən ilin müvafiq dövrü ilə müqayisədə 16,5 min ton azalıb. Bu haqda 30 dekabr tarixində Energetika Nazirliyinin saytında məlumat verilib.
Neft hasilatının 65%-i “Azəri-Çıraq-Günəşli”nin, 12%-i “Şahdəniz”in, 23%-i isə SOCAR-ın payına düşüb.
Sözügedən dövr ərzində 25 milyon tondan çox neft ixrac edilib.
Eyni zamanda 2021-ci ilin ilk 11 ayında 39,7 milyard kubmetr təbii qaz hasil olunub. 2020-ci illə müqayisədə qaz hasilatı 6 milyard kubmetrə yaxın artıb.
Qazın 31%-i “Azəri-Çıraq-Günəşli”dən, 51%-i “Şahdəniz”dən, 18%-i isə SOCAR üzrə hasil edilib.
Bu dövr ərzində xaricə 16,9 milyard kubmetr qaz satılıb. Qaz əsasən Türkiyə və Avropaya ixrac olunub.
