Azərbaycanda 2021-ci ilin yanvar-oktyabr aylarında 22 855,8 milyon kVts elektrik enerjisi istehsal olunub. Bu da ötən ilin eyni dövrü ilə müqayisədə 1 554,4 milyon kVts çoxdur. Bu barədə məlumat 30 noyabr tarixində Energetika Nazirliyinin rəsmi səhifəsində yayılıb.
Hesabat dövründə elektrik enerjisinin 21 458,6 milyon kVts istilik elektrik stansiyalarında, 1 108,9 milyon kVts su elektrik stansiyalarında, 77 milyon kVts külək elektrik stansiyalarında, 48,5 milyon kVts günəş elektrik stansiyalarında, 162,8 milyon kVts isə Bərk Məişət Tullantılarının Yandırılması Zavodunda istehsal edilib.
Cari ilin ilk 10 ayı ərzində 1 156 milyon kVts elektrik enerjisi ixrac olunub, 130,8 milyon kVts isə idxal olunub.
