Azərbaycanda "Media haqqında" yeni qanun layihəsi Milli Məclisin keçirilən iclasında qəbul edilib. Bu haqda dekabrın 14-də Report məlumat verib.
Yeni qanun layihəsinə əsasən, media nümayəndələrinə jurnalist vəsiqəsi veriləcək. Sözügedən vəsiqənin forması, onun verilməsinə və ya dəyişdirilməsinə görə ödənişin məbləği müvafiq icra hakimiyyəti orqanının müəyyən etdiyi qurum tərəfindən müəyyən ediləcək. Vəsiqənin etibarlılıq müddəti 3 il olacaq. Onun etibarlılıq müddəti bitdikdə jurnalistə yeni vəsiqə almaq üçün 3 iş günü müddətində vaxt veriləcək.
Jurnalist vəsiqəsini alan şəxslər dövlət və bələdiyyə mülkiyyətində olan muzeylərə, qalereyalara, habelə mədəni-ictimai tədbirlərin həyata keçirildiyi obyektlərə ödənişsiz daxil ola biləcəklər.
Həmçinin yeni qaydalara görə, çap mediası və onlayn media subyektinin təsis edilməsi üçün dövlət orqanlarından icazə tələb olunmur. Bu sahə ilə məşğul olan hüquqi və ya fiziki şəxs çap mediası məhsulunun istehsalından və materialın yayımlanmasından 7 gün əvvəl müvafiq icra hakimiyyəti orqanının müəyyən etdiyi quruma rəsmi müraciət etməlidir.
Eləcə də qanun layihəsində əks olunub ki, media subyekti digər media subyektinin informasiyasını istinad etməklə abunəlik və ya müqavilə əsasında istifadə edə bilər. Abunəlik və ya müqavilə olmadıqda hər bir informasiyanın yalnız üçdə birindən çox olmayan hissəsindən istinad etməklə yararlanmaq olar.
