Aprelin 21-də Bolqarıstanın paytaxtı Sofiyada gənc boksçular arasında Avropa birinciliyində final döyüşləri baş tutub. Çempionluq uğrunda mübarizədə Azərbaycan millisinin üzvü Kənan Babayev qalib gəlib.
Azərbaycan Boks Federasiyasından verilən məlumata görə, türkiyəli, gürcüstanlı və irlandiyalı təmsilçiləri məğlub edən idmançımız finalda polşalı Nikolas Marsel Pavliklə qarşılaşıb. 48 kiloqram çəki dərəcəsində baş tutan görüş təmsilçimizin qələbəsi ilə yekunlaşıb.
Bununla da, Kənan Babayev qitə birinciliyinin qızıl medalına sahib olaraq Avropa çempionu tituluna yiyələnib.
Beləliklə, Azərbaycan yığması 40 ölkədən 400-dən çox boksçunun qatıldığı Avropa birinciliyində çıxışını 1 qızıl və 1 bürünc medalla başa vurub. Babayevdən öncə Amin Məmmədzadə (51 kq) 3-cü yeri tutub.
