Hazırda daxili bazarda günəbaxan yağına olan tələbatın yüksəlməsi və qiymət artımı müşahidə olunur. Bununla bağlı 19 aprel tarixində Report araşdırma aparıb.
Məlumata əsasən, ölkəmizdə bunun səbəblərindən biri Rusiya-Ukrayna münaqişəsinin yaratdığı mənfi təsirdir. Bildirilib ki, qiymət artımının səbəblərindən biri də yerli istehsalın az olmasıdır.
“Qiymət artımına qarşı tədbirlər həyata keçirilir, amma elə məsələlər də var ki, bu, hökumətdən, dövlətdən asılı deyil”, - Milli Məclisin deputatı Vahid Əhmədov fikir bildirib.
Millət vəkili Azərbaycanda duru yağın istehsalı məsələlərinə də toxunub: “Duru yağ istehsalı istiqamətində müəyyən addımlar atılmalıdır, çünki yağa kifayət qədər ehtiyacımız var, ona görə də idxal edirik”.
İqtisadçı-ekspert Eldəniz Əmirov bildirib ki, bitki yağları bir çox ölkələrdə, o cümlədən də Azərbaycanda inflyasiyanın təsirinə daha çox məruz qalan ərzaq məhsullarındandır. Ekspert bildirib ki, hər bir ölkə öz ərzaq təhlükəsizliyini qorumaq üçün müxtəlif ərzaq məhsullarının ixracına qadağalar qoyur: “Məsələn, son dövrlərdə Türkiyədə yağla bağlı belə qadağa oldu ki, bu da məhsulun dünya bazarındakı qiymətinə təsir edir”.
Azərbaycanda bu ilin yanvar-mart ayları ərzində 12 min 979,6 ton duru bitki yağları istehsal edilib.
