Azərbaycanda hal-hazırda pomidor istehsalında qıtlıq var və tələb təklifi üstələyir. Bu sözləri "Azərbaycan Meyvə-Tərəvəz İstehsalçıları və İxracatçıları Assosiasiyası" İctimai Birliyinin sədri Bəşir Quliyev Reporta 20 aprel tarixindəki açıqlamasında bildirib.
“7-8 həftə bundan əvvəl qışın ən soyuq günləri idi. Ona görə pomidorun yetişmə prosesi zəif sürətlə gedirdi. Bu səbəbdən pomidor istehsalında aprel ayında məhsuldarlıq azdır”, - deyə sədr məlumat verib. O, əlavə edib ki, bir həftədən sonra istehsal artacaq və qiymətlər enəcək.
Bəşir Quliyev qeyd edib ki, hazırda istehsalçılarda böyük həcmdə pomidor ehtiyatı yoxdur və qiymətlər bu səbəbdən artır.
İctimai Birliyin sədri Rusiya-Ukrayna müharibəsinin Azərbaycanın pomidor ixracına olan təsirindən də bəhs edib. “Münaqişə başlayanda şimal qonşumuzun sərhəd-keçid məntəqəsində məhsullarımız günlərlə qalırdı. Bu isə pomidorların xarab olmasına səbəb olurdu. Martda istehsalçılarımız çox əziyyət çəkdilər, böyük ziyana uğradılar”, - B.Quliyev deyib.
Lakin onun sözlərinə əsasən, son 3 həftə ərzində sərhəd-keçid məntəqələrində yük maşınlarının keçmə sürəti normallaşıb.
2022-ci ilin yanvar-mart aylarında Azərbaycan 38 milyon dollarlıq pomidor ixrac edib. Bu, ötən illə müqayisədə 83% çoxdur.
