Azərbaycanda qablaşdırma sənayesinin inkişafına mane olan bir sıra çətinliklər var. Bunlar xammalın gömrük rüsumlarının yüksək olması və malların hər dəfə 1-10 gün gömrük ərazisində qalmasıdır. Məsələ barəsində 18 aprel tarixində “Azərbaycan Qablaşdırma Sənayesi Assosiasiyası” İctimai Birliyinin sədri Kamran Hacızadə Reporta danışıb.
“Qablaşdırmanın maya dəyərinin azalması üçün gömrük rüsumunun azaldılması vacibdir. Həmçinin mallarımızın günlərlə gömrükdə saxlanılması bizim üçün əlavə xərclər yaradır, məhsullarımızın maya dəyərini artırır”, - deyə sədr bildirib.
Kamran Hacızadə açıqlamasında qablaşdırma sənayesi ilə bağlı sərgilərin keçirilməsini təklif edib: “Hər il müxtəlif sahələrlə bağlı sərgilər keçirilir. Təəssüf ki, qablaşdırma sənayesi üzvləri üçün belə bir imkan yaradılmır”.
O, həmçinin Rusiya-Ukrayna müharibəsinin qablaşdırma sahəsinə təsirindən də danışıb.
“Rusiya qablaşdırma sektorunda əsas xammal istehsalçısı deyil. Xammalı əsasən Çin, Türkiyə və Avropadan alırıq. Məhsullarımızın əsas ixrac bazarı isə Gürcüstan və Orta Asiya ölkələridir. Aqrar sektoru təmsil edən şirkətlərə məhsul satırıq. Rusiya bu siyahıda da öndə deyil”.
Lakin K.Hacızadə əlavə edib ki, hazırda müharibənin təsirləri hiss edilməsə də, qonşu ölkəyə aqrar məhsulların ixracı azalsa, bu, qablaşdırma sənayesinə mənfi təsir göstərəcək.
