Azərbaycandan qanunsuz şəkildə Gürcüstana keçmək istəyən Sudan vətəndaşları saxlanılıblar. Bu barədə 13 sentyabr tarixində Dövlət Sərhəd Xidməti məlumat yayıb.
Sentyabrın 12-də “Zaqatala” sərhəd dəstəsinin Balakən rayonunun Poçtbinə kəndi yaxınlığında yerləşən sərhəd zastavasının xidməti ərazisində Azərbaycandan Gürcüstan istiqamətində dövlət sərhədini pozmağa cəhd göstərən Sudan Respublikası vətəndaşları - 25 yaşlı Hassan Abdelgadir Noreen və 33 yaşlı Ahmed Mahmoud Mohamedc Abdelrahman saxlanılıblar.
Saxlanılan şəxslərin 9 sentyabr tarixində ölkə ərazisinə rəsmi qaydada gəlmələri, dövlət sərhədini pozaraq Azərbaycandan Gürcüstana, oradan isə Avropa ölkələrinə miqrasiya etmək niyyətində olmaları məlum olub.
Eyni zamanda sentyabrın 12-də “Xudat” sərhəd dəstəsinin Xaçmaz rayonunun Xanoba kəndi yaxınlığında yerləşən sərhəd zastavasının xidməti ərazisində Azərbaycan Respublikasından Rusiya Federasiyası istiqamətində dövlət sərhədini pozmağa cəhd göstərən 60 yaşlı Gəncə şəhər sakini Ramiz Babayev saxlanılıb.
Fakt üzrə qeyri-leqal miqrasiya kanalının aşkarlanaraq zərərsizləşdirilməsi istiqamətində əməliyyat-istintaq tədbirləri davam etdirilir.
[gallery link="file" columns="2" size="full" ids="129643,129642"]
